ازاي ارفع مناعة الطفل بأسهل الطرق
ازاي ارفع مناعة الطفل
كتبت/ ندى عبد الفتاح
🔴خطوات هامه لزياده مناعه طفلك
1. رضعى طبيعى .
2. اتغذى كويس وانتى حامل وكلى كل أصناف الأكل!
3. مترضعيش صناعى .
4. مترضعيش صناعى إلا بوصف طبيب ثقة وبعد
استنفاذ كل المحاولات للطبيعى .
5. لبن السرسوب ده أول “درع مناعة طبيعى”
لطفلك متحرميهوش منه !!
6. بلاش تحمى النونو بصابون أول ما ينزل !!
7. الصابون بعد الولادة مباشرة بينشف الجلد
وبيزود احتمالات حدوث حساسية طعام وإكزيما … ندهن كريم .. الكريم يكسب
8. في سن معين الكريمات فيه بتكون مفيدة اكتر
لجلد طفلك و في سن معين الصابون بيكون
مناسب ، و يكون احسن اكيد لو صابون مطهر ،
المهم يكون في دائماً وقاية
9. مفيش في الدنيا أحسن من النضافة المستمرة
،، نضافة و الأهم تطهير المكان والمسح والغسيل
لأسطح البيوت والحمامات بمطهرات ومنظفات
باستمرار مهم ،القناع (MASK) على الوشّ مش
رفاهية عشان ابنك ميشمش الأتربة والغبار فى الجو المريب ده!
10. كملى رضاعة طبيعية على قد ما تقدرى لسن سنتين.
11. سنتين آه والله ده مش بس كلام الأمريكان
ده كلام رب الإنس والجان ” والوالدات يرضعن أولادهن حولين كاملين “.
12. بلاش ممبار وفتة وكوارع للنونو ده لسه
مدخلش دنيا مش بتجهزيه عشان يلعب “سومو” حضرتك
13. دخول منتجات الألبان (زبادى وجبن) والقمح
والفول السودانى والمكسرات متوسط ٦ شهور
تحت إشراف طبيب ، و على صورة مناسبة
لسنهم، وبشرط عدم وجود حساسية طعام أو
إكزيما مزمنة – دى آخر توصيات الأكاديمية
الأمريكية للحساسية والمناعة .. إحنا آسفين يا
ستو انتى كنتى صح وراسك ابوسها
14. مفيش كالسيوم بدون فحص أو تحليل ،، في
توصيات للحديد بعد السادس إلا لو كان بيدخل
فى الوجبات ، ڤيتامين د من أول يوم ولادة وانتا
طالع ،، شخصياً بحب الفاكهة والخضار صدقونى الطبيعي مفيش زيه !!
15. الحديد في التفاح والفراخ واللحمة والعسل
الاسود ،، ڤيتامين د فى الشمس للجلد علطول ،،
الكالسيوم فى اللبن مش محتاجة يعنى
16. غسيل و تطهير الأيدى قبل الحمام وبعده
أهم من قبل الأكل وبعده – وكله مهم .. و كمان
متنسيش قص الضوافر. الحاجتين دول بيقوا من
دشليون نوع من الجراثيم أبسطها البكتيريا
والديدان .. بالمناسبة الديدان مش هتسيب “جتة”
ابنك الا اما تتعالجى انتى وابو العيال والعيال
كلهم واي حد بياكل معاكم على ترابيزة واحده
وطنط مديحة صاحبتك اللى بتعزميها عالغدا
والبنت الغلبانه اللى بتساعدك فى البيت – اه كلهم
لازم يغسل ويطهر إيده و ياخد الدوا غصب واقتدار
17. أنا شاكك بنسبة ١٠٠٪ ان كل الأمهات اللى
بتقولّى الواد معندوش مناعة خالص انه بيطلع حساسية.
18. ابنك اللى مناخيره بترشح مواسم أو صيف
شتا أو مسربة توينتى فور ان سيڤين دى
حساسية .. حساسية والله العظيم حساسية . مش نقص مناعة .
19. ابنك اللى كل شتا بيكح ده معندوش نقص
مناعة ولا نيلة .. كل الحكاية ان عنده حساسية
أنف ، اقفلى الحنفية من فضلك الحوض (الصدر) يسلك على طول
20. “صلب الراس” عالرابع ،، والقعود ممكن يتأخر
للتاسع ،، والوقوف لسنة ،، والسنان سنة وشهر ،،
والمشى سنة ونص .. ومتسألينيش بالغالية الواد
مطلعش نياب على ٥ شهور ليه زى ابن خالته ،،
خالته نفسها لو دراكولا مش هتطلع نياب في السن ده
21. لأ الحرارة المتكررة كل شهر مش مقبولة ،،
الزكام المتكرر والرشح مش مقبول ،، التهاب اللوز
اللى مبيفصلش مرفوض ،، الإسهال المزمن ،،
الإمساك المزمن ،، القئ(الترجيع) المتكرر بعد ٦
شهور ،، المخاط فى البراز ، عدم زيادة الوزن ، ألم
البطن المتكرر … عاوز تقول إيه ؟؟ عاوز اقول
الأطفال دى محتاجة فحص محترم عشان فى سر وراها أكيد فى سر !!!!
22. لا تعطى ابنك مضاد حيوى من نفسك ،، لا
تعطى ابنك مضاد حيوى في السنة الأولى من
العمر من نفسك ،، لا تعطى ابنك أى شئ غير
العلاجات الطبيعية من نفسك .
23. المضاد الحيوى بدون داعى في السنة الأولى
من العمر مسئول بشكل مباشر عن “إفساد”
البكتيريا النافعة فى الجهاز الهضمى التى لها الدور
الأكبر فى نمو جهاز المناعة و منع حدوث
الحساسية .. يعنى إيه !!! أيوا بالضبط كده يا
حاجة ،، المضاد “بدون داعى” بيأذى الطفل مش بيفيده !!
24. ابنى عنده ٧ شهور و مش بيجرى ليه زى ابن عمه
– حضرتك لو مخلفه محمد صلاح ذات نفسه مش هيجرى فى السن ده !! كفاية كدب بأه 😂
25. ميبقاش ابنك بتسمعى صوت صدره
“مشخلل” ليل نهار ،، ودور قفلة الصدر بيتكرر
عليه أكتر من قفلة باب بيتكو ولما الدكتور
يشخصه حساسية ويكتبله على بخاخات
كورتيزون تقولى لأ هديله كورتيزون شرب عشان
البخاخات مضرة وهيتعود عليها .. كده المنطق جاله تسلخات حضرتك
26. “بخاخات الكورتيزون للأنف والفم أحدث
علاج لحساسية الأنف والصدر وأقلها آثاراً جانبية
،، وأكثرها أمانا ” …. •حقيقة علمية•
27. النوم الكويس لطفلك ٨ ساعات ،، فاكهة
يومية زى الموز والكيوى ،، التنبيه على البعد عن
مصدر العدوى من أطفال بيكحوا فى الفصول
ولبس الكمامة MASK ,,الشمس تدخل جوا
البيت وابنك يتعرض ليها يومياً ،،،، الرياضة
طويلة النفس زى السباحة مثلاً ..- كل اللى فات
ده “أبرك” مين ١٠٠ ڤيتامين الأمهات بتسألنى عنها
كأنها “سوبر مان ” المناعة 😆 لأ اللى قلته ده
عيلة Avengers كلها مش سوبر مان بس 😂
28. مش أى شوية برد نقص مناعة ،،،ومش كل
حساسية أنف أو صدر نقص مناعة .. وحدى الله يا حاجة ابنك زى الفل
29. لو ابنك جاله التهاب رئوى مرتين فأكثر فى
السنة ،، أو التهاب أذن وسطى جديد ٤ مرات
فأكتر فى السنة ، أو جيوب أنفية خطيرة مرتين
فأكتر في السنة ، أو ماشى على مضاد حيوى
بقاله شهرين فأكتر بتحسن بسيط أو دايماً يحتاج
مضاد وريدى عند العلاج أو جاله خراريج متكررة
فى أماكن عميقة فى الجسم أو تسمم دم أو
فطريات مش بتخف رغم العلاج أو مبيزيدش فى
الوزن كويس أو حد فى العيلة عنده نقص مناعة
وراثى – أى اتنين مع بعض من اللى قلتهم دول
يخلوكى تفكرى فى نقص المناعة فوراً
30. حساسية اللبن والأطعمة دى نوع من
“لخبطة” جهاز المناعة .. فبيهاجم الأكل كإنه
بكتيريا مثلاً فبيعمل رد فعل عنيف فى الجسم
على شكل أعراض جهاز هضمى أو جلدى أو
تنفسى أو صدمة تحسسية .. حاولى تتغذى
كويس وانتى حامل ،، وتاكلى كل أصناف الأكل ،،
وتدهنى جسم النونو بكريمات ترطيب من أول
يوم ،، و تدخلى الأكلات لابنك بدرى بإشراف طبيب ،، وربنا يعيننا جميعاً ☝
31. انسو اللى قلتوا ده كله ومتنسوش إن روقان
البال هوا أحسن حاجه بترفع المناعة … مفيش
حياة من غير متاعب وهموم .. هيا الدنيا كده
فيها تعب … وفيها فرحه وضحكة ونجاح ..
خدها على بعضها .. صدقنى هتستريح
🔴 ندخل بقى على ترتيب دخول الأطعمة اللي يخلي طفلك ياكل كل حاجة مع الوقت ❤
١. #الحبوب (الأرز، القمح، الشوفان، الشيا)
و ميزة إدخالهم في البداية من اول الشهر
السادس انه سهل نخلطهم باللبن سواء لبن الأم او
الصناعي واللي طعمهم بيكون مستساغ للأطفال
فالتغيير مش بيكون مفاجئ اوي 😍
٢. #الخضار (كوسة، جزر، ملوخية، بطاطس)
و ميزة إدخالهم من بداية الشهر السادس للسابع و
قبل دخول الفواكه ، انك بتضمني ان ابنك مش
بيتعود من البداية علي الطعم المسكر اللي يخليه
يرفض الخضار بأنواعه بعد كدة ☺️
٣. #الفواكه (تفاح، موز، عنب، برقوق)
و من بداية إداخله في اواخر الشهر السابع لازم
تراعي انه يتقدم بكميات محددة بعد الوجة
الرئيسية من الخضار ، لإن مينفعش اننا نتعود
ناكل فاكهة بس علي انها وجبة اساسية و نعاني بعد كدة عشان ناكل خضار 🥰
٤. #البروتين (الدجاج و بعض انواع السمك و اللحم)
و دول لازم نبدأ تقديمهم من منتصف الشهر
الثامن او اول التاسع من عمر الطفل و في حالة
رفضها ممكن نقدم شربتهم لحد ميبدأ الطفل
يحب طعمهم وفي الوقت دا مينفعش تستعيني
باللحوم الجاهزة المصنعة زي البرجر و الناجس
لإنها بتحتوي علي مواد حافظة و الوان و مواد
ممكن تسبب حساسية او تعود فيما بعد 😌
ازاي ارفع مناعة الطفل
و احذري من انك تأخري تقديمهم او تستني لبعد
السنة لإن البروتين الطبيعي بيساعد علي نمو
عضلات الطفل و دا اللي بيساعده علي الحركة و المشي 🤗
مع العلم 👇
ازاي ارفع مناعة الطفل
* إن بداية إدخال الطعام و المياه بتكون من الشهر السادس.
مع مراعاه 👇
*اختبار حساسية الطعام لجسم الطفل بتقديم
نوع واحد في البداية و بكمية قليلة تسمحلنا
بمعرفة الاطعمة المسببة للحساسية .
ازاي ارفع مناعة الطفل
وانتبهي 👍
* انك لازم تقدمي نوع خضار او فاكهة جديدة كل
ما لا يقل عن ٣ ل ٤ ايام عشان تكسري التعود .
ازاي ارفع مناعة الطفل
و متنسيش 🤔
* ان الرفض ممكن يستمر لعشر مرات او اكتر لحد
م الطفل بيعتاد الطعم و دا مش معناه انه مش
بيحب النوع دا و احذري كلمة مبيحبوش عشان
هتتقال علي اي نوع اكل بعد كدة .
واهم حاجة 👍
*الاكل مش بالغصب ولا بالزعيق و العقاب .
اعرضيها علي كل مامي جديدة ❤️
ليصلكم مزيد من المعلومات عن الطفل والاسره تابعنا
او من خلال صفحتنا علي الفيس بوك
التعليقات مغلقة.